امریکہ کی ریاست کیلیفورنیا کے تین علاقوں میں لگنے والی آگ بے قابو ہوگئی، جس کے نتیجے میں اب تک پانچ افراد ہلاک ہوئے ہیں۔ آگ نے سینکڑوں عمارتوں کو تباہ کر دیا اور تقریباً ایک لاکھ سے زیادہ لوگ اپنا گھر چھوڑنے پر مجبور ہوگئے۔

امریکی کی سب سے زیادہ آبادی والی ریاست کیلیفورنیا کے جنگلات میں آگ لگنا معمول کی بات ہے، لیکن اس بار لاس اینجلس میں لگنے والی آگ کو اب تک کی بدترین آگ قرار دیا جارہا ہے۔

آگ نے تین علاقوں کو اپنی لپیٹ میں لیا ہوا ہے۔ اس بارے میں ہم اب تک کیا جانتے ہیں:

لاس اینجلس میں جنگل کی آگ کہاں اور کب شروع ہوئی؟

امریکی میڈیا آوٴٹ لیٹس کے مطابق آگ پہلے کیلیفورنیا کے شہر لاس اینجلس کے مضافاتی علاقے پیسفک پلیسیڈز میں منگل کی صبح مقامی وقت کے مطابق صبح 10 بجکر 30 منٹ پر لگی تھی. اب یہ اگ تین علاقوں میں پھیل چکی ہے اور 10 ہزار 938 ایکڑ رقبے کو مکمل طور پر جلا دیا ہے۔

عینی شاہدین کے مطابق آگ نے گھروں کو بھی اپنی لپیٹ میں لے لیا ہے، جبکہ ایک لاکھ افراد کو محفوظ جگہ منتقل کرنے کے احکامات جاری کر دیئے گئے ہیں۔

آگ سے درجنوں گھر، گاڑیاں اور دیگر املاک جل گئیں اور ہزاروں گھر بجلی کی سہولت سے محروم ہیں۔

1400 فائر فائٹرز ریسکیو آپریشن میں مصروف

کیلیفورنیا کے گورنر گیون نیوزوم کا کہنا ہے کہ آگ پر قابو پانے کے للیے 1400 سے زیادہ فائر فائٹرز ریسکیو آپریشن میں مصروف ہیں۔

انہوں نے کہا کہ ’ایمرجنسی اہلکار، فائر فائٹرز، اور لوگوں کو جان بچانے کے لیے ہر ممکن کوشش کررہے ہیں۔‘

اب تک ہم کیا جاتتے ہیں؟

لاس اینجلس کے ساحل کے قریب تین جنگلات میں آگ لگی ہے۔

پیلی سیڈز

سب سے بڑی آگ لاس اینجلس کے مشرق میں واقع پیسیفک پیلی سیڈز میں موجود جنگل میں لگی جس نے 6 ہزار ایکڑ سے زیادہ رقبے کو اپنی لپیٹ میں لے لیا۔ یہاں فلم، ٹی وی اور میوزک انڈسٹری سے تعلق رکھنے والی نامور شخصیات رہائش پزیر ہیں۔ ایک نیوز کانفرنس میں لاس اینجلس کاؤنٹی کے فائر چیف انتھونی مارون کے مطابق اس علاقے میں اب تک ایک ہزار سے زیادہ عمارتیں تباہ ہو چکی ہیں۔

اینجلس کاؤنٹی کے فائر چیف انتھونی مارون کے مطابق اس علاقے میں اب تک ایک ہزار سے زیادہ عمارتیں تباہ ہو چکی ہیں۔ جبکہ ریسکیو آپریشن کے دوران ایک خاتون فائر فائٹر کے سر میں چوٹ لگی۔

ایٹن

دوسری آگ ایٹن کے علاقے میں لگی جو 2000 ایکڑ سے زیادہ رقبے تک پھیل چکی ہے۔ اس علاقے میں بھی دو افراد ہلاک ہوئے۔

سی بی ایس نیوز کے مطابق اس علاقےسے تقریباً ہزاروں افراد کومحفوظ مقام منتقل کرنا پڑا۔ سوشل میڈیا پر گردش کرنے والی ویڈیوز میں بزرگ افراد کو اپنے نرسنگ ہوم سے باہر جاتے دکھایا گیا ہے، بہت سے وہیل چیئرز اور اسٹریچرز پر محفوظ جگہ منتقل ہوئے۔

ہرسٹ

تیسری آگ لاس اینجلس کے شمال مغرب میں واقع سان فرنینڈو وادی میں لگی، جسے ہرسٹ فائر کہا گیا ہے، جو 500 ایکڑ پر پھیل چکی تھی۔ حکام نے بتایا کہ تینوں میں سے کسی بھی آگ کو ابھی تک قابو نہیں پایا جا سکا۔

عمارتیں، گرجا گھر اور درخت تباہ

کیلیفورنیا کے فائر چیف انتھونی مارون کے مطابق پیسفک پیلیسیڈس میں تقریباً ایک ہزار عمارتیں تباہ ہو چکی ہیں۔ پیلی سیڈز میں لگنی والی آگ نے مشہور آرٹ میوزیم کو بھی نقصان پہنچا اور ساتھ کھڑے درختوں اور پودوں کو بھی جلا دیا۔

ایٹن کی آگ نے میکڈونلڈ کے ایک ریستوراں اور گرجا گھروں کو بھی جلا دیا۔

متاثرہ علاقوں سے دسیوں ہزار افراد کو محفوظ مقامات پر منتقل کر دیا گیا ہے اور سکول بند کر دیے گئے ہیں۔ ہالی ووڈ کی کئی تقریبات بھی منسوخ کر دی گئی ہیں۔

ہسپتالوں میں مریضوں کا رش دیکھا گیا جہاں سانس لینے میں مشکل کی شکایات سب سے زیادہ سامنے آئیں۔ بڑے پیمانے پر لگنے والی اس آگ کے باعث تین لاکھ سے زائد گھر اور تجارتی مراکز بجلی سے محروم ہو گئے ہیں۔