میکسیکو کے حکام کا کہنا ہے کہ بدنامِ زمانہ اور مطلوب ترین ڈرگ لارڈ 'ایل مینچو' اپنی محبوبہ سے ملاقات کی وجہ سے پکڑا گیا اور اس کی محبوبہ کی نگرانی کر کے سیکیورٹی اہلکار 'ایل مینچو' کے ٹھکانے کا پتا لگانے میں کامیاب رہے۔
میکسیکو کی فوج نے اتوار کو ایک بڑی کارروائی کرتے ہوئے ملک کے سب سے بڑے جرائم پیشہ گینگ کے سرغنہ نیمیسیو اوسیگوئیرا المعروف 'ایل مینچو' کو ہلاک کر دیا تھا جس کے بعد سے ملک میں گینگ کے کارندوں کے حملے اور ہنگامہ آرائی جاری ہے۔
میکسیکو کے وزیرِ دفاع جنرل ریکارڈو ٹریویلا نے کارروائی کی تفصیلات بتائی ہیں کہ حکام کیسے ملک کے سب سے مطلوب شخص تک پہنچے۔
محبوبہ کے ساتھی کی نگرانی
میکسیکو اور امریکہ دونوں کئی برسوں سے ایل مینچو کے تعاقب میں تھے اور ان کے ٹھکانے کا پتا لگانے کی کوشش کر رہے تھے۔ ایل مینچو منشیات کی اسمگلنگ اور دیگر سنگین جرائم میں دونوں ملکوں کو مطلوب تھے لیکن ان کا کوئی سراغ نہیں مل رہا تھا۔
وزیرِ دفاع جنرل ریکارڈو ٹریویلا کے بقول اس بار کوششیں بار آور ثابت ہوئیں اور بڑی کامیابی اس صورت میں ملی کہ فوج کے سراغ رساں ایل مینچو کی ایک محبوبہ کے بااعتماد ساتھی کا پتا لگانے میں کامیاب ہو گئے اور اس کی نگرانی شروع کر دی۔
وزیرِ دفاع نے مزید بتایا کہ یہ شخص جمعے کو ایل مینچو کی محبوبہ کو ان سے ملانے ہیلسکو کے ایک علاقے تپالپا لے گیا۔ تاہم ان کے ٹھکانے کی بالکل درست لوکیشن کی تصدیق امریکی انٹیلی جینس کی جانب سے فراہم کردہ 'انتہائی اہم معلومات' کی وجہ سے ممکن ہوئی۔
فضائی اور زمینی محاصرہ
جب ایل مینچو کی محبوبہ ملاقات کے بعد اس کے ٹھکانے سے نکل گئی تو میکسیکو کی فوج کی اسپیشل فورسز نے ایل مینچو کی موجودگی کی تصدیق کرنے کے بعد کارروائی کو حتمی شکل دینا شروع کر دی۔
میکسیکن فوج اور نیشنل گارڈز کے دستوں نے علاقے کو گھیرے میں لے لیا اور چھ ہیلی کاپٹر اور اضافی فوجی دستوں کو ہیلسکو کی پڑوسی ریاستوں میں اسٹینڈ بائی رکھا گیا۔
وزیرِ دفاع کے بقول میکسیکو کی ایئرفورس کی بھی مدد لی گئی اور اتوار کی علی الصباح ایل مینچو کی ٹھکانے پر موجودگی کی تصدیق کے بعد آپریشن شروع کر دیا گیا۔
جنرل ٹریویلا نے مزید بتایا کہ ایل مینچو کے ٹھکانے پر فورسز اور جرائم پیشہ افراد کے درمیان شدید فائرنگ کا تبادلہ ہوا اور اسی بیچ میں ایل مینچو نے اپنے دو باڈی گارڈز کے ساتھ فرار کی کوشش کی جب کہ ان کے دیگر ساتھی سیکیورٹی فورسز کو الجھائے رکھنے کی کوشش کر رہے تھے۔
وزیرِ دفاع نے بتایا کہ ایل مینچو جنگل میں جھاڑیوں میں چھپ گیا۔ ان کے ساتھی راکٹ لانچرز جیسے بھاری اسلحے سے لیس تھے لیکن وہ اسے استعمال نہ کر سکے۔ سیکیورٹی فورسز نے اس سے قبل ہی انہیں جھاڑیوں میں چھپنے کی کوشش کرتے ہوئے پکڑ لیا تاہم اس موقع پر ایک اور شدید جھڑپ ہوئی جس میں ایل مینچو اور ان کے دو ساتھی زخمی ہو گئے۔
منتقلی کے دوران ہلاکت
جب جائے واقعہ کو محفوظ بنا لیا گیا تو ایل مینچو اور ان کے دو باڈی گارڈز کو زخمی حالت میں ہیلی کاپٹر میں سوار کرایا گیا۔ لیکن چوں کہ ان کی حالت نازک تھی تو وہ قریبی اسپتال لے جانے کی کوشش کے دوران ہی ہلاک ہو گئے۔
ان کی موت کے بعد ہیلی کاپٹر کی منزل تبدیل کی گئی اور ہیلسکو کے اسپتال لے جانے کے بجائے لاشوں کو میکسیکو سٹی منتقل کیا گیا تاکہ کسی پرتشدد واقعے یا گینگ اراکین کے جوابی حملوں سے بچا جا سکے۔
