نیوزی لینڈ میں سات سال قبل مسجد پر حملہ کر کے 51 مسلمانوں کو قتل کرنے والے مجرم نے اپنے جرم قبولیت کے خلاف عدالت سے رجوع کرتے ہوئے ٹرائل کرنے کا مطالبہ کیا ہے۔ مجرم کا کہنا ہے کہ جب اس نے جرم قبول کیا تو اس کی ذہنی حالت ٹھیک نہیں تھی اور وہ اب اپنے خلاف الزامات پر ٹرائل کا سامنا کرنا چاہتا ہے۔
سفید فاموں کی برتری کے حامی 35 سالہ آسٹریلوی شہری برینٹن ٹیرنٹ نے مارچ 2019 میں نیوزی لینڈ کے شہر کرائسٹ چرچ میں نمازِ جمعہ کے دوران مسجد میں فائرنگ کی تھی اور اس پورے عمل کو فیس بک پر لائیو اسٹریم بھی کیا تھا۔ یہ نیوزی لینڈ کی تاریخ کی سب سے ہلاکت خیز ماس شوٹنگ تھی۔
ٹیرنٹ نے گرفتاری کے بعد عدالت میں پہلے خود پر عائد الزامات کا انکار کرتے ہوئے ٹرائل کا سامنا کرنے کا فیصلہ کیا تھا لیکن بعد ازاں اس نے جرائم قبول کر لیے تھے۔ اس پر 51 قتل، 40 اقدامِ قتل کے الزامات کے ساتھ ساتھ دہشت گردی کا الزام بھی شامل تھا۔ حملہ آور کو ان الزامات کے تحت عمر قید کی سزا سنائی گئی ہے جو نیوزی لینڈ کی تاریخ میں پہلی بار کسی کو عمر قید ہے۔
مجرم کی اپیل پر سماعت شروع ہو گئی ہے جو ممکنہ طور پر جمعے تک جاری رہے گی۔ عدالت یہ جائزہ لے گی کہ آیا جرم قبول کرتے وقت مجرم سوچ سمجھ کر فیصلے لینے کے قابل تھا یا نہیں۔
پیر کو سماعت کے پہلے دن بعض متاثرین کے لواحقین بھی عدالت میں جمع ہوئے۔ حملے میں ہلاک ایک شخص طاہر کے والد راشد عمر نے میڈیا سے گفتگو میں کہا کہ 'یہ پیش رفت پریشان کن ہے کیوں کہ مجرم ہم سب سے کھیلنے کی کوشش کر رہا ہے۔ یہ صرف ہمارے وقت کے ضیاع اور ٹیکس ادا کرنے والے عوام کے پیسے کے ضیاع کی کوشش ہے۔'
اگر عدالت مجرم کی اپیل خارج کر دیتی ہے تو رواں سال ہی اس کی سزا کے خلاف اپیل کی سماعت ممکن ہے۔ تاہم اگر عدالت اپیل منظور کرتی ہے تو مقدمہ دوبارہ ہائی کورٹ کو بھیجا جائے گا کہ وہ ٹیرنٹ کو ٹرائل کا موقع دے۔
