انڈیا امریکہ سے پیٹرولیم مصنوعات، دفاعی ساز و سامان، الیکٹرونکس اور جہاز بھی خریدے گا: انڈین عہدے دار

انڈیا اور امریکہ کے درمیان ایک تجارتی معاہدہ طے پایا ہے جس کے تحت واشنگٹن نے نئی دہلی پر عائد ٹیرف کم کر دیے ہیں۔ امریکی صدر ٹرمپ نے اعلان کیا ہے کہ بدلے میں انڈیا نہ صرف روس سے تیل کی خریداری بند کر کے امریکہ سے تیل خریدے گا، تجارتی رکاوٹیں ختم کرے گا اور اربوں ڈالر کی کئی اور مصنوعات بھی امریکہ سے لے گا۔

ٹرمپ نے بھی اپنے پیغام میں کہا ہے کہ انڈیا 'پہلے سے کہیں زیادہ بڑے پیمانے پر امریکی مصنوعات خریدے گا۔' ان کے بقول انڈیا 500 ارب ڈالر مالیت تک کی امریکی توانائی، کوئلہ، ٹیکنالوجی، زرعی ساز و سامان اور دیگر مصنوعات لے سکتا ہے۔

سرکاری عہدے دار نے نام ظاہر نہ کرنے کی شرط پر بتایا کہ انڈیا نے امریکہ کے تجارتی خسارے کو کم کرنے کے لیے امریکی مصنوعات خریدنے پر رضامندی ظاہر کی ہے۔ انڈیا کی وزارتِ تجارت نے معاملے پر فی الحال کوئی تبصرہ نہیں کیا ہے۔

انڈیا کی وزارتِ کامرس کے ڈیٹا کے مطابق نئی دہلی نے امریکہ کو 85.5 ارب ڈالر کی برآمدات کی ہیں جب کہ درآمدات کا حجم اس کا تقریباً نصف 46.08 ارب ڈالر رہا ہے۔

سرکاری عہدے دار نے رائٹرز کو بتایا کہ حالیہ تجارتی معاہدہ صرف ابتدا ہے، آئندہ چند ماہ میں ایک جامع اور تفصیلی معاہدے پر بھی بات چیت ہوگی۔

اس تجارتی معاہدے کے تحت انڈیا امریکی گاڑیوں پر بھی ٹیرف کم کرنے پر آمادہ ہو گیا ہے۔ امریکہ کا یہ مطالبہ تھا کہ تجارتی خسارے کو کم کرنے کے لیے فوری طور پر یہ اقدام کیا جائے۔