پاک - افغان سرحد کا محاذ جمعرات کی رات سے ایک بار پھر گرم ہے۔ افغانستان کی جانب سے سرحد پر حملوں کے بعد پاکستان نے کابل، قندھار اور پکتیکا کے علاقوں میں فضائی حملے کیے ہیں اور اہم عسکری تنصیبات کو تباہ کرنے کا دعویٰ کیا ہے۔
جمعرات کی رات سے جمعے کی دوپہر تک کیا ہوا؟
- پاکستان اور افغان طالبان حکومت کے درمیان جمعرات کی رات سے شروع ہونے والی جھڑپیں اب بھی جاری ہیں۔
- گزشتہ شب طالبان حکومت کے ترجمان نے 21 فروری کے حملوں کے جواب میں سرحد پر پاکستانی پوسٹس کو نشانہ بنانے اور ان پر قبضہ کرنے کا دعویٰ کیا۔
- پاکستان نے افغانستان پر جوابی حملے کیے جو اب بھی جاری ہیں۔ پاکستانی فورسز نے افغانستان کے تین صوبوں میں فضائی حملے بھی کیے ہیں۔
- پاکستان کے وزیرِ اطلاعات عطا اللہ تارڑ کے مطابق کابل، قندھار اور پکتیکا میں طالبان کے دفاعی اہداف کو نشانہ بنایا گیا ہے۔
- پاکستان کے وزیرِ اطلاعات نے افغان طالبان کے 133 اہلکاروں کی ہلاکت اور 200 کے زخمی ہونے کا دعویٰ کیا ہے۔
- طالبان کی وزارتِ دفاع نے پاکستان کے 55 فوجیوں کی ہلاکت اور متعدد کو یرغمال بنانے کا دعویٰ کیا ہے۔
- طالبان حکومت کے ترجمان ذبیح اللہ مجاہد نے پاکستانی فضائی حملوں کی تصدیق کی ہے۔ تاہم ان کا کہنا تھا کہ ان میں کوئی نقصان نہیں ہوا۔
- پاکستان کے وزیرِ دفاع خواجہ آصف نے افغانستان کو ’کھلی جنگ‘ کی دھمکی دی ہے اور کہا ہے کہ ہمارے صبر کا پیمانہ اب لبریز ہو چکا ہے۔
- ایران نے ثالثی کی پیش کش کی ہے جب کہ سعودی اور پاکستانی وزرائے خارجہ نے معاملے پر تبادلہ خیال کیا ہے۔
پاکستان اور ترک وزرائے خارجہ کا ٹیلی فونک رابطہ
پاکستان کی وزارتِ خارجہ نے کہا ہے کہ وزیرِ خارجہ اسحاق ڈار نے اپنے ترک ہم منصب حاقان فیدان سے ٹیلی فونک رابطہ کیا ہے جس میں علاقائی صورتِ حال بالخصوص پاکستان اور افغانستان کی حالیہ کشیدگی پر تبادلۂ خیال کیا گیا۔
دونوں رہنماؤں نے خطے میں امن اور استحکام کی اہمیت پر زور دیا اور بدلتی ہوئی صورتِ حال پر رابطے میں رہنے پر اتفاق کیا۔
افغانستان کا اسلام آباد سمیت کئی شہروں میں ڈرون حملوں کا دعویٰ، بغیر کسی نقصان کے تمام ڈرون گرا دیے: وزیرِ اطلاعات پاکستان
افغانستان کی وزارتِ دفاع نے دعویٰ کیا ہے کہ ان کی 'ایئرفورس' نے صبح 11 بجے کے قریب پاکستان کے دارالحکومت اسلام آباد سمیت نوشہرہ، جمرود اور ایبٹ آباد میں فوجی تنصیبات اور چھاؤنیوں پر ڈرونز کے ذریعے فضائی حملے کیے ہیں۔
افغان وزارتِ دفاع نے دعویٰ کیا کہ ان کا یہ آپریشن کامیاب رہا۔ جب کہ پاکستان نے کسی نقصان کے بغیر تمام ڈرون مار گرانے کا دعویٰ کیا ہے۔
پاکستان کے وزیرِ اطلاعات و نشریات عطا تارڑ نے اپنی ایک پوسٹ میں کہا کہ فتنہ الخوارج (ٹی ٹی پی) کے دہشت گردوں نے ایبٹ آباد، صوابی اور نوشہرہ میں چھوٹے ڈرون لانچ کرنے کی کوشش کی تھی۔ تمام ڈرونز کو بغیر کسی نقصان کے کامیابی سے تباہ کر دیا گیا۔
عطا تارڑ نے مزید کہا کہ ایسے واقعات افغان طالبان اور پاکستان میں دہشت گردی کے درمیان براہِ راست تعلق کو بے نقاب کرتے ہیں۔
طورخم بارڈر پر افغانستان کے کچھ مناظر
اختلافات سفارت کاری سے حل کریں: روس
روسی خبر ایجنسی 'آر آئی اے' نے رپورٹ کیا ہے کہ ماسکو نے پاکستان اور افغانستان پر زور دیا ہے کہ وہ ایک دوسرے پر حملے فوراً روک کر باہمی اختلافات کو سفارتی ذرائع سے حل کرنے کی کوشش کریں۔
پاکستان اور افغانستان بین الاقوامی قوانین کی پابندی کریں: اقوامِ متحدہ
بی بی سی کے مطابق اقوامِ متحدہ کے سیکریٹری جنرل انتونیو گوتریس نے پاکستان اور افغانستان کے درمیان جھڑپوں پر اظہارِ خیال کرتے ہوئے کہا ہے کہ دونوں ممالک بین الاقوامی قانون، بالخصوص انسانی حقوق کے قانون کے تحت اپنی ذمے داریوں کی سختی سے پابندی کریں۔
دوسری جانب اقوامِ متحدہ کے انسانی حقوق کے سربراہ وولکر ترک نے افغانستان اور پاکستان سے مسائل کا حل بات چیت سے تلاش کرنے کی اپیل کی ہے۔
جمعے کی صبح چمن بارڈر کی صورتِ حال
ایران کی پاکستان اور افغانستان کے درمیان ثالثی کی پیش کش
ایران کے وزیرِ خارجہ عباس عراقچی نے پاکستان اور افغانستان کے درمیان ثالثی کی پیش کش کی ہے۔
ایکس پر اپنے بیان میں عباس عراقچی نے کہا ہے رمضان میں، جو ضبطِ نفس اور عالمِ اسلام میں یک جہتی کے فروغ کا مہینہ ہے، مناسب یہ ہوگا کہ افغانستان اور پاکستان اختلافات کو مکالمے کے ذریعے حل کریں۔
انہوں نے کہا کہ ایران بات چیت میں سہولت اور باہمی تعاون کے فروغ کے لیے ہر ممکن مدد کو تیار ہے۔
سعودی عرب اور پاکستان کا رابطہ
سعودی عرب کے وزیرِ خارجہ فیصل بن فرحان آل سعود کا پاکستانی ہم منصب اسحاق ڈار سے ٹیلی فونک رابطہ ہوا ہے جس میں دونوں رہنماؤں نے افغانستان کے ساتھ کشیدگی کی صورتِ حال پر گفتگو کی ہے۔
سعودی پریس ایجنسی کے مطابق وزرائے خارجہ کے ٹیلی فونک رابطے میں خطے کی صورتِ حال اور علاقائی استحکام اور سیکیورٹی کو برقرار رکھتے ہوئے کشیدگی کم کرنے کے طریقوں پر تبادلۂ خیال کیا گیا۔
اب ہماری تمھاری کھلی جنگ ہے: پاکستانی وزیرِ دفاع
پاکستان کے وزیرِ دفاع خواجہ آصف نے افغانستان کو کہا ہے کہ اب ہمارے صبر کا پیمانہ لبریز ہو چکا ہے۔ اب ہماری اور تمھاری کھلی جنگ ہے۔
ایکس پوسٹ میں خواجہ آصف کا کہنا تھا کہ نیٹو افواج کے انخلا کے بعد یہ توقع تھی کہ افغانستان میں امن ہوگا اور طالبان عوام کے مفادات اور علاقے میں امن پر توجہ دیں گے۔ مگر طالبان نے افغانستان کو ہندوستان کی کالونی بنا دیا۔
خواجہ آصف نے الزام لگایا کہ طالبان نے دنیا بھر کے دہشت گردوں کو افغانستان میں اکٹھا کر کے دہشت گردی کو ایکسپورٹ کرنا شروع کر دیا۔ پاکستان نے براہِ راست اور دوست ممالک کے ذریعے حالات نارمل رکھنے کی پوری کوششیں کیں مگر طالبان انڈیا کی پراکسی بن گئے۔
انہوں نے مزید کہا کہ اب کھلی جنگ ہے، اب دما دم مست قلندر ہوگا۔ ہم افغانستان کے ہمسائے ہیں اور ان کی اوقات جانتے ہیں۔
