بنگلہ دیش نیشنلسٹ پارٹی کے اتحاد نے انتخابات میں بھاری اکثریت سے میدان مار لیا

بنگلہ دیش کے الیکشن کمیشن نے جمعے کی دوپہر حتمی و سرکاری نتائج جاری کیے ہیں۔ بنگلہ دیش نیشنلسٹ پارٹی (بی این پی) 209 نشستوں پر کامیابی کے بعد دو تہائی اکثریت حاصل کر چکی ہے جب کہ جماعتِ اسلامی نے 68 سیٹوں پر کامیابی حاصل کی۔

الیکشن کمیشن کے سیکریٹری اختر احمد نے 299 میں سے 297 نشستوں کے نتائج جاری کیے ہیں۔ چٹاگانگ کے دو حلقوں کے نتائج ابھی جاری نہیں کیے گئے۔

الیکشن کمیشن کے مطابق دیگر سیاسی جماعتوں میں طلبہ کی نیشنل سٹیزن پارٹی نے چھ نشستوں پر کامیابی حاصل کی جب کہ خلافت مجلس پارٹی نے دو نشستوں پر کامیابی حاصل کی۔

اس کے علاوہ اسلامی اندولن، گنا اودھیکار پریشد، بنگلہ دیش جاتیہ پارٹی، گنا سنگھتی آندولن نے ایک، ایک سیٹ جیتی جب کہ سات نشستوں پر آزاد امیدوار بھی کامیاب ہوئے ہیں۔

بنگلہ دیش نیشنلسٹ پارٹی 20 سال بعد دوبارہ اقتدار میں آ رہی ہے، پارٹی نے بڑی جیت پر عوام کا شکریہ ادا کرتے ہوئے نمازِ جمعہ میں ملک کے لیے خصوصی دعائیں کرنے کی درخواست کی ہے۔

مقامی میڈیا کا دعویٰ ہے کہ جمعرات کے انتخابات میں ٹرن آؤٹ (یعنی کتنے فی صد لوگوں نے ووٹ ڈالا) 60 فیصد کے قریب رہا۔

جماعت اسلامی کا نتائج پر عدم اطمینان کا اظہار

جماعتِ اسلامی بنگلہ دیش نے ووٹ گنتی کے عمل پر سوالات اٹھاتے ہوئے نتائج پر عدم اطمینان کا اظہار کیا ہے۔ جماعت اسلامی نے اپنے ایک بیان میں کہا ہے کہ 'ہم انتخابات کے نتائج کے عمل سے مطمئن نہیں ہیں۔'

تاہم جماعت کے رہنماؤں نے صبر و تحمل اختیار کرنے کی بھی اپیل کی۔

انتخابات ملک میں استحکام کے لیے اہم

بنگلہ دیش کے ان انتخابات اور اس کے نتائج کو ملک میں استحکام کے حوالے سے بہت اہم قرار دیا جا رہا ہے۔ جولائی 2024 میں شیخ حسینہ کی حکومت کے خاتمے کے بعد سے بنگلہ دیش میں انتشار، بے چینی اور بے یقینی کے فضا ہے جسے ان انتخابات سے ختم کرنے میں مدد ملے گی۔

ماہرین کا کہنا ہے کہ بی این پی کو بھاری اکثریت سے فتح ملنے کی وجہ سے آئندہ حکومت کے لیے آسانی ہوگی کہ وہ اصلاحات اور قانون سازی پر مضبوط مینڈیٹ کے ساتھ کام کر سکے گی۔

بی این پی کے سربراہ اور سابق وزیرِ اعظم خالدہ ضیا کے بیٹے طارق رحمان ممکنہ طور پر نئے وزیرِ اعظم ہوں گے جو تقریباً 18 برس جلا وطن رہنے کے بعد دسمبر 2025 میں ہی ڈھاکہ آئے تھے۔

گو کہ ابھی انتخابات کے حتمی و سرکاری نتائج کا اعلان نہیں ہوا ہے تاہم بی این پی کی ظاہر فتح پر عالمی رہنماؤں کی جانب سے مبارک بادوں کا سلسلہ بھی شروع ہو گیا ہے۔

پاکستان کے صدر آصف علی زرداری اور وزیراعظم شہباز شریف نے بنگلہ دیش نیشنلسٹ پارٹی اور اس کے رہنما طارق رحمان کو 'بھاری اکثریت' حاصل کرنے پر مبارک باد دی ہے اور نئی حکومت کے ساتھ مل کر کام کرنے کا عزم ظاہر کیا ہے۔

بنگلہ دیش میں تعینات امریکی سفیر نے بی این پی اور اس کے رہنما طارق رحمان کو کامیاب انتخابات اور 'تاریخی کامیابی' پر مبارک باد دی ہے جب کہ انڈیا کے وزیرِ اعظم نریندر مودی نے بھی مبارک باد اور نیک تمناؤں کا اظہار کیا ہے۔

آئینی ریفرنڈم کے کیا نتائج آئے ہیں؟

گزشتہ روز لوگوں نے اپنے نمائندے کے انتخاب کے ساتھ ساتھ ایک آئینی ریفرنڈم پر بھی اپنی رائے دی ہے جو ملک میں اصلاحات اور نظام کی تبدیلی سے متعلق تھا۔ ان مجوزہ اصلاحات میں وزیرِ اعظم کی مدت کو دو ٹرمز تک محدود کرنے اور مضبوط عدلیہ کے ساتھ ساتھ انتخابات کے دوران غیر جانب دار نگران حکومتوں کے قیام اور ایک اور ایوان قائم کرنے کی تجاویز بھی شامل تھیں۔

ریفرینڈم کے نتائج کے بارے میں سیکریٹری الیکشن کمیشن نے بتایا ہے کہ 48 لاکھ 74 ہزار افراد نے ہاں میں ووٹ دیا جب کہ دو کروڑ 25 لاکھ سے زیادہ افراد نے نفی میں ووٹ دیا ہے۔