امریکی صدر ڈونلڈ ٹرمپ نے انڈیا پر عائد ٹیرف 50 فیصد سے کم کر کے 18 فیصد کرنے کا اعلان کیا ہے۔ انڈیا کے وزیرِ اعظم نریندر مودی نے اس اقدام پر امریکی صدر کا شکریہ ادا کیا ہے۔
پیر کو ٹرمپ نے اپنے پیغام میں انڈیا کے ساتھ تجارتی معاہدے کا اعلان کرتے ہوئے کہا کہ نئی دہلی روسی تیل خریدنا بند کر دے گا اور امریکہ یا ممکنہ طور پر وینزویلا سے تیل خریدے گا۔
امریکی صدر ڈونلڈ ٹرمپ نے ابتدا میں انڈین مصنوعات پر 25 فیصد ٹیرف عائد کیا تھا۔ لیکن اگست 2025 میں روسی تیل خریدنے کی پاداش میں 25 فیصد مزید ٹیرف بطور جرمانہ عائد کیا تھا جس کے بعد انڈین مصنوعات پر کل محصولات 50 فیصد تک پہنچ گئی تھیں۔
اب نہ صرف بطور جرمانہ عائد 25 فیصد ٹیرف ختم کر دیا گیا ہے بلکہ اصل ٹیرف میں بھی کمی کرتے ہوئے اسے 25 سے 18 فیصد کر دیا گیا ہے جس کی وجہ سے انڈیا کو خطے کے دیگر ممالک پر سبقت حاصل ہو گئی ہے۔
یاد رہے کہ یہ ٹیرف پاکستان، بنگلہ دیش اور چائنہ سے بھی کم ہے۔ امریکہ نے پاکستان پر 19 فیصد جب کہ چائنہ پر 34 فیصد ٹیرف عائد کیا تھا جب کہ انڈونیشیا پر بھی 19 فیصد، بنگلہ دیش اور ویتنام پر 20, 20 فیصد ٹیرف عائد ہے۔
ٹرمپ کا کہنا تھا کہ جواب میں انڈیا امریکی مصنوعات پر ٹیرف میں بھی کمی کرے گا اور اسے صفر تک لے جائے گا۔
امریکی صدر نے مزید کہا کہ روسی تیل کی خریداری روکنے سے یوکرین میں جنگ کے خاتمے میں مدد ملے گی جہاں ہر ہفتے ہزاروں افراد مر رہے ہیں۔
انڈیا نے حال ہی میں روس سے تیل کی خریداری میں کمی شروع کی ہے۔ جنوری میں انڈیا نے روس سے 12 لاکھ بیرل یومیہ تیل خریدا جب کہ فروری میں توقع ہے کہ یہ خریداری 10 لاکھ بیرل یومیہ پر آ جائے گی جب کہ مارچ میں آٹھ لاکھ بیرل تک نیچے جانے کی امید ہے۔
'میرے بہترین دوست ٹرمپ کا بہت شکریہ'
انڈین وزیرِ اعظم نریندر مودی نے ٹیرف میں کمی پر صدر ڈونلڈ ٹرمپ کا شکریہ ادا کیا ہے۔
ایکس پر جاری اپنے پیغام میں مودی نے کہا کہ 'مجھے اپنے دوست صدر ٹرمپ سے بات کر کے بہت اچھا لگا۔ میں خوش ہوں کہ اب انڈیا میں بننے والی مصنوعات پر 18 فیصد ٹیرف عائد ہوگا۔ میں اس بہترین اعلان پر انڈیا کے ایک ارب 40 کروڑ عوام کی جانب سے صدر ٹرمپ کا بہت شکریہ ادا کرتا ہوں۔'
انڈیا کا امریکہ کے ساتھ یہ تجارتی معاہدہ ایسے وقت طے پایا ہے جب حال ہی میں انڈیا نے یورپی یونین کے ساتھ بھی ایک بڑے تجارتی معاہدے پر دستخط کیے ہیں۔ یورپی یونین کے ساتھ فری ٹریڈ ایگریمنٹ کے تحت 96.6 فیصد مصنوعات پر یا تو کوئی ٹیرف عائد نہیں ہوگا یا بہت کم ہوگا۔
وزیر اعظم مودی کا کہنا تھا کہ عالمی امن و استحکام اور خوش حالی کے لیے صدر ٹرمپ کی قیادت بہت اہمیت رکھتی ہے۔ انڈیا ان کی امن کے لیے کوششوں کی بھرپور حمایت کرتا ہے۔
انڈین وزیر اعظم کا مزید کہنا تھا کہ وہ صدر ٹرمپ کے ساتھ مل کر کام کرنے کی طرف دیکھ رہے ہیں تاکہ اس شراکت داری کو بے مثال بلندیوں تک لے جایا جا سکے۔
