کولمبیا میں پیر کو ایک فوجی طیارہ ٹیک آف کے دوران حادثے کا شکار ہو کر تباہ ہو گیا جس میں 66 افراد ہلاک اور درجنوں شدید زخمی ہوئے ہیں۔ چار افراد اب بھی لاپتا ہیں جن کی تلاش جاری ہے۔
حادثے کا شکار ہونے والا جہاز لاک ہیڈ مارٹن کا تیار کردہ ہرکولیس سی ون تھرٹی تھا جس میں 128 افراد سوار تھے۔ کولمبیا کی فوج کے سربراہ کے مطابق مسافروں میں 11 ایئرفورس کے اہلکار، 115 فوجی اور دو پولیس افسران شامل تھے۔
وزیرِ دفاع پیڈرو سانچیز کے مطابق حادثہ اس وقت پیش آیا جب طیارہ اڑان بھرنے کے بعد فضا میں بلند ہو رہا تھا۔
ایک فائر فائٹر کے مطابق رن وے کے آخر میں طیارہ اڑان بھرتے ہوئے کسی چیز سے ٹکرا گیا اور نیچے گر گیا۔ نیچے گرتے ہوئے طیارے کا پر ایک درخت سے بھی ٹکرایا۔
فائر فائٹر کے مطابق حادثے کے بعد جہاز میں آگ بھڑک اٹھی اور کوئی دھماکہ خیز ڈیوائس بھی موجود تھی جو پھٹ گئی۔
حادثہ ایک دوردراز علاقے میں پیش آیا جہاں کے مقامی افراد ریسکیو کے لیے پہنچے۔ مقامی افراد نے ریسکیو اداروں کے پہنچنے سے پہلے ہی کئی زخمی فوجیوں کو موٹر سائیکلوں پر منتقل کیا۔
حکام کے مطابق زندہ بچ جانے والے 57 مسافروں کو اسپتال منتقل کیا گیا جن میں سے 30 کی حالت خطرے سے باہر ہے۔
طیارہ ساز امریکی کمپنی لاک ہیڈ مارٹن نے کہا ہے کہ وہ حادثے کی وجوہات کے تعین کے لیے کولمبیا کے ساتھ تحقیقات میں تعاون کریں گے۔ہرکولیس 'سی 130' طیارے پہلی بار 1950 کی دہائی میں لانچ کیے گئے تھے۔ یہ ایک فوجی طیارہ ہے جو ساز و سامان اور فوجی اہلکاروں کی منتقلی کے لیے استعمال ہوتا ہے۔
کولمبیا نے 1960 کی دہائی میں 'سی 130' کے ابتدائی ماڈل حاصل کیے تھے اور حال ہی میں کچھ پرانے طیاروں کو نئے ماڈلز سے تبدیل بھی کیا ہے۔
